[2012 芬蘭．破冰船] Day 3 北歐最美麗首都．斯德哥爾摩

~Day 3~

24/1/2012 (Tuesday) 少雪

斯德哥爾摩 --> 市政廳 (City Hall) --> 舊城區 (Gamla Stan) --> 土庫 (Turku)

8:00 am	起身喇, 琴日講到佢個爐係壞既, 加上今日行程會好緊密, 所以今朝決定食餅乾當早餐... 然後就執好行理去辦理 check in + check out 手續, 哈哈... 去到 reception, 那些 staff 還在吃早餐, 真悠閒...
9:00 am	我地寄存行理係 hostel, 六點 reception 關門前要番黎拎番... 然後就出發往市政廳 (City Hall), 市政廳位於國王島上, 由 hostel 或中央車站步行就可到達。
10:00 am	要參觀市政廳必須跟 tour 的, 通常一個鐘一場, 想參加最好預先睇定時間表。 我地個 tour 十點鐘開始, 大約四十五分鐘, 由一個瑞典既靚女帶我地遊市政廳內部, 一入去個大廳就係每年諾貝爾獎頒獎禮後舉行晚宴既地方喇。
	呢 d 就係諾貝爾頒獎禮後晚宴用既餐具...
11:00 am	遊完市政廳就係外面影下相, 眼前呢個景有北方威尼斯之稱, 不過睇睇下, 我地覺得呢度都幾似日本既釧路喎。
11:30 am	再行去舊城區 (Gamla Stan), 如果唔想行可以搭地鐵係 Gamla Stan 站落車。
11:50 am	黎到皇宮 (Kunglia Slottet), 十二點有衛兵換班儀式, 我地係度諗, 天氣咁凍, 可以落班休息果個駐守士兵應該好開心...
12:35 pm	再行出少少欣賞下斯德哥爾摩港既景色, 雖然唔係要行好遠, 但成地雪都行得好辛苦下。
1:25 pm	又係時候食 lunch 喇, 黎到瑞典梗係想食瑞典肉丸啦, 但舊城區呢度間間餐廳都係食意大利野 (因為呢度係北方威尼斯嘛 >.<), 咁就是但搵左一間叫 Sallys 既餐廳... 入到去睇下個餐牌, 都係冇瑞典肉丸, 選擇又少, 奇怪既係佢門口明明有 set lunch 既牌, 入到黎又冇, 於是我地就問佢係咪有 set lunch, 佢話有, 咁我乘機問埋佢有冇肉丸, 佢又話有喎, yeah... 最後叫左一個瑞典肉丸同一個 set lunch, yummy！
2:15 pm	食飽飽就繼續遊舊城區, 走到德意志教會 (Tyskakyrkan) 同大教堂 (Storkyrkan)。
2:45 pm	一路走到 Gamla Stan 地鐵站, 搭地鐵到 Skinnarviksberget hill, 黎呢個唔知叫乜鬼野既山都係因為睇左旅遊書介紹, 話呢度可以睇到成個 stockholm city 既美態... 但係黎到又唔覺有乜特別 >.< 個山就冇乜特別, 反而地鐵站入面既設計就幾特別...
4:00 pm	搭地鐵去 Hotorgshallen 魚市場, 入面全部都係賣魚的, 除左街市, 亦有好多餐廳仔, 好似 food court 咁... 我地去左一間叫 Kajsas Fisk Kopparberg 飲瑞典魚湯, 個魚湯真係落足料, 用左勁多海鮮黎煲, 除左個魚湯, 仲叫左一個 fish & chips, 好好味, d 魚好新鮮, 賣相當然係一流。
5:00 pm	食完野就再繼續周圍行, 最後去到賽格爾斯廣場 (Sergels Torg)...
5:45 pm	走回 hostel 取行理, 然後去搭巴士。今晚要搭 Viking Line 維京郵輪到芬蘭喇, 佢自已有架 shuttle bus 去碼頭, 但所謂既 shuttle bus 係要俾錢的, 仲要唔平, 咁我地自已就搭普通巴士, 一樣可以去到碼頭丫, 個巴士司機仲好好人, 提我地落車仲要教埋我地點行。
8:00 pm	黎到碼頭要辦理 check in 手續, 其實只需要俾個 booking number 佢, 好快就可以出到船飛俾我地。郵輪夜晚八點於瑞典斯德哥爾摩啟航, 第二朝七點半就會到達芬蘭既土庫 (Turku), 可以搭下郵輪, 又可以慳番晚酒店, 真係一個唔錯既選擇。 我地 book 左一間二人房, 係上下格床, 房內有洗手間浴室。放低行理就出去走走, 船上面有好多娛樂設施, 有賭場啦, 俾小朋友玩既遊戲室, Sauna 房, 仲有好多餐廳同免稅商店。 我地玩左一陣老虎機, 羸左 5 EUR, yeah...!
11:00 pm	之後返房沖涼, 原本十一點船上會有表演睇, 但我地實在太累, 最後決定早 d 訓...